Hearing from God: in Pidgin

God like fo' talk pidgin.

He stay real smart - 

He know what I trying fo' say

when clarity falls through da pukas in my sentences

cuz my English stay all buss up 

like Jesus when they hung him on top da cross.

Every time I gotta talk

I come scared 

cuz I no like sound like I neva go school,

so I try fo' wrap up my words

like one banana lumpia or one lau lau,

except I make like Adam 

and hide 'em behind one fig leaf

so I can pretend fo' be

all sophisticated.

But God,

all da time he tell me,

Hui Sistah!  Why you gotta act?

No need dress up your speech

in one business suit.

He wen' tell me

dat when he gave da world da truth,

he gave 'em naked - 

neva need be fancy,

neva need be shame.

So God, I going pray like dis to you,

cuz dis is how I like fo' talk

every time I go back Big Island,

and I like you fo' talk to my maddah guys

and everybody else who stay ova' there.

They gotta know

you hear their prayers,

even if get some people who no can

understand what they trying fo' say.

They gotta know

they no need pretend fo' be

somebody they not,

dat more better they be real

cuz you already love 'em choke

and you like fo' talk

pidgin with them.

* Sorry, I never learned in school how to spell in pidgin. haha.